Bagaman taglay ng Korte Suprema ng Virginia ang parehong orihinal at hurisdiksiyon ng apela, ang pangunahing tungkulin nito ay suriin ang mga desisyon ng mga mas mababang hukuman. Hindi pinapayagan ng Virginia ang apela sa Korte Suprema bilang isang karapatan maliban sa mga kasong kinasasangkutan ng State Corporation Commission [Komisyon ng Korporasyon ng Estado], ang pagpapatanggal ng pagiging isang abogado, at pagsusuri ng parusang kamatayan.
Ang orihinal na hurisdiksiyon ng Korte ay limitado sa mga kaso ng habeas corpus (pag-uutos sa isang humahawak ng kustodiya na iharap ang nakakulong na tao sa Korte sa layunin ng pagtukoy kung ang naturang pag-iingat ay nararapat), mandamus (pag-uutos sa may hawak ng isang tanggapan na gampanan ang kaniyang tungkulin), pagbabawal (pag-uutos sa isang pampublikong opisyal na ihinto ang isang aksiyon), at aktuwal na kawalang-kasalanan (batay sa bayolohikal na pagsusuri). Ang Korte Suprema ay mayroon ding orihinal na hurisdiksiyon sa mga kasong isinampa ng Judicial Inquiry and Review Commission [Komisyon sa Paglilitis at Pagsusuri ng Panghukuman] na may kaugnayan sa pagpapahayag ng hatol at pagreretiro, at pagtanggal ng mga hukom.
